ប្រែសម្រួល៖ រតនា
ទីក្រុងតៃប៉ិ៖ តៃវ៉ាន់បានបញ្ជូនមន្ត្រីទៅកាន់វ៉ាស៊ីនតោនដើម្បីពិភាក្សាអំពីលទ្ធភាពនៃការដាក់ពន្ធគយដោយប្រធានាធិបតី Donald Trump ហើយបានធ្វើការត្រៀមខ្លួនប្រសិនបើពន្ធគយទាំងនោះត្រូវបានដាក់ចេញ នេះបើយោងតាមការថ្លែងរបស់រដ្ឋមន្ត្រីក្រសួងសេដ្ឋកិច្ច លោក គួ ជីហ៊ួយ នៅថ្ងៃសៅរ៍ (ថ្ងៃទី៨ ខែកុម្ភៈ)។
ក្រុមហ៊ុនបច្ចេកវិទ្យានៅតៃវ៉ាន់ ដែលជាទីតាំងនៃក្រុមហ៊ុនផលិតឈីបកិច្ចសន្យាធំជាងគេបំផុតលើពិភពលោក TSMC កំពុងប្រឈមនឹងលទ្ធភាពដែលលោក Trump នឹងអនុវត្តតាមការគំរាមកំហែងដាក់ពន្ធគយលើឈីបនាំចូល បន្ទាប់ពីលោកបានចោទប្រកាន់តៃវ៉ាន់ក្នុងយុទ្ធនាការឃោសនាឆ្នាំមុនថាបានលួចអាជីវកម្មឧបករណ៍ចម្លងសេមីគ្រាប់ពីអាមេរិក។
លោក Trump បានថ្លែងកាលពីថ្ងៃសុក្រថា លោកមានគម្រោងប្រកាសដាក់ពន្ធគយទៅវិញទៅមកលើសេដ្ឋកិច្ចជាច្រើននៅថ្ងៃចន្ទ ឬថ្ងៃអង្គារ ដែលជាការពង្រីកយុទ្ធនាការដ៏សំខាន់មួយរបស់លោកក្នុងការរៀបចំទំនាក់ទំនងពាណិជ្ជកម្មសកលឡើងវិញតាមរបៀបដែលលោកយល់ថាជាផលប្រយោជន៍របស់អាមេរិក។
ក្នុងការថ្លែងទៅកាន់អ្នកសារព័ត៌មាននៅទីក្រុងតៃប៉ិ លោក គួ បានថ្លែងថា ក្រសួងបានធ្វើការត្រៀមខ្លួនសម្រាប់ពន្ធគយអាមេរិកណាមួយ ប៉ុន្តែមិនបានបញ្ជាក់លម្អិតទេ។
នៅពេលត្រូវបានសួរអំពីពន្ធគយលើឈីប លោក គួ បានថ្លែងថា លោកបានបញ្ជូនរដ្ឋមន្ត្រីរងម្នាក់ និងប្រធានផ្នែករងម្នាក់ទៅកាន់វ៉ាស៊ីនតោន។ លោកមិនបានបញ្ជាក់អត្តសញ្ញាណពួកគេ ឬផ្តល់ព័ត៌មានបន្ថែមទេ។
ពួកគេនឹង “ព្យាយាមផ្តល់ការពន្យល់ល្អៗខ្លះដល់ក្រុមរបស់លោក Trump” អំពីឧស្សាហកម្មឈីបរបស់តៃវ៉ាន់ លោកបានបន្ថែម ដោយមិនបានពន្យល់លម្អិត។”តៃវ៉ាន់គឺជាដៃគូល្អបំផុតរបស់សហរដ្ឋអាមេរិក។”
តៃវ៉ាន់បានថ្លែងជាច្រើនដងថា វិស័យឈីបរបស់ខ្លួន និងក្រុមហ៊ុនអាមេរិកមាន “កិច្ចសហប្រតិបត្តិការឈ្នះ-ឈ្នះ”។
ប៉ុន្តែតៃវ៉ាន់មានអតិរេកពាណិជ្ជកម្មច្រើនជាមួយសហរដ្ឋអាមេរិក ដែលបានកើនឡើង ៨៣ ភាគរយក្នុងឆ្នាំមុន ដោយការនាំចេញរបស់កោះនេះទៅសហរដ្ឋអាមេរិកឈានដល់កំណត់ត្រា ១១១,៤ ប៊ីលានដុល្លារអាមេរិក ដោយសារតម្រូវការផលិតផលបច្ចេកវិទ្យាខ្ពស់ដូចជាសេមីគ្រាប់។
លោក គួ បានស្នើថា តៃវ៉ាន់អាចធ្វើតាមគំរូជប៉ុន និងនាំចូលថាមពលអាមេរិកកាន់តែច្រើន។
“យោងទៅលើជប៉ុន គាត់មានការប្តេជ្ញាចិត្តខ្ពស់ពេលនិយាយដល់រឿងថាមពល” លោកបានថ្លែង ដោយសំដៅលើលោក Trump។ “យើងសង្ឃឹមថាយើងអាចបំពេញតាមតម្រូវការរបស់សហរដ្ឋអាមេរិកពាក់ព័ន្ធនឹងបញ្ហានេះ។”
ជប៉ុននឹងចាប់ផ្តើមនាំចូលឧស្ម័នធម្មជាតិរាវពីសហរដ្ឋអាមេរិកក្នុងបរិមាណច្រើនជាងគេ នេះបើតាមការថ្លែងរបស់លោក Trump កាលពីថ្ងៃសុក្រ បន្ទាប់ពីការពិភាក្សាជាមួយនាយករដ្ឋមន្ត្រីជប៉ុន លោក ស៊ីហ្គេរុ អ៊ីស៊ីបា។
អូស្ត្រាលី និងកាតា គឺជាប្រទេសផ្គត់ផ្គង់ LNG ចម្បងរបស់តៃវ៉ាន់នាពេលបច្ចុប្បន្ន៕
ប្រភព៖ រ៉យទ័រ
